إِنَّ الدِّينَ عِندَ اللّهِ الإِسْلاَمُ

الأربعاء، مايو 23، 2007

أسهم الخير

بسم الله الرحمن الرحيم
والصلاة والسلام علي أشرف الرسلين سيدنا محمد وعلي أله وصحبه وسلم

بالأمس
مساءاً
تلقيت رسالة قصيرة علي تليفوني المحمول
محتواها , انه هناك طفلة حديثة الولادة تحتاج نقل دم فصيلة
-A
الرسالة وصلتني من شخصية عزيزة جداً
وموثوق منها
ولكن عادة ما يرتابني الشك قبل تمرير أي من هذه الرسائل
سواء علي الميل أو علي الموبيل
وحيث أن فصيلة دمي هي
AB
وحيث أني مش عارف هي تنفع ولأ
ولكن الموضوع أخذ مني تفكيراً لفترة حتي بعد صلاة العشاء
ومكنتش عارف أمرر الرسالة ولا لأ
وقررت أن اتصل بنمرة الهاتف المرفقة بالرسالة والتي كتب أنها هاتف والدها
أجاب علي الهاتف وشرحت له أنه وصلتني الرسالة بمحتواها
قال لي أنها وصلتني متأخرة
الحمد لله وجدوا فصيلة الدم
والبنت عملت العملية
عملية في القلب
وهي بالعناية المركزة
وسألني الدعاء أكثر من ثلاث مرات
سألته أين يسكن قال أنه يسكن في القاهرة
:) أستغربت لأنني في الأسكندرية
فقال أن الرسالة دارت في محافظات مصر
و الحمد لله أن الموضوع خلص
البنت أسمها رولا
أرجو أن تتذكروها في دعائكم
________________________________________________

الخير موجود
فينا كلنا واحد واحد
ومايحدث يومياً يثلج صدري
المشكلة في الرسائل من هذا النوع من كثرته أصبحنا نتلقاها بلا مبالاة
وكأنها شئ عادي هيمر مرور الكرام
يعني مشكلة حتتحل من تلقاء نفسها
أنا كنت كسلان في مواضيع التقصي
بس أكتشفت أنه شئ مهم جداً
وممكن يفتح لك أبواب كانت مقفولة
التليفون ده فتح لي حاجات كتير ممكن أكون مش عارف أعبر عنها
وأسألكم الدعاء
ولاتنسوا أن أملنا نتشبث به
نوره سيتمه ولوكره الكافرون
__________________________________________
أنا تلقيت هذه الرسالة اليوم علي الأيميل
لو حد عنده أستعداد
السلام عليكم و رحمة الله و بركاته
سيدة مريضة بحاجة لأجراء جلسة علاج مرة واحدة كل اسبوع و بحاجة لمتطوع بسيارة لنقلها من سكنها بشارع احمد بدوي بشبرا لأجراء الجلسة في المجالس الطبية المتخصصة و انتظارها لمدة ساعة هي مدة الجلسة ثم اعادتها لمقر سكنها في شبرا مرة أخرى
علماً بانها غير قادرة على تحمل تكلفة اسئجار تاكسي كل مرة و ليس لديها من ينقلها
موعد الجلسة هو صباح يوم الاحد من كل اسبوع
من يستطيع المساعدة لتخفيف الام هذه السيدة برجاء الاتصال بأيهاب في رقم 0121179884
تقبل الله منا و منكم صالح الاعمال



هناك 13 تعليقًا:

ammola يقول...

فكرة البوست جميلة فعلا
بالمناسبة انا فصيلتى-o nigative-
اى خدمة

ma_3alina يقول...

السلام عليكم ورحمة الله وبركاته
بينو أخويا .. كيف حالك ؟؟ ...
أخبارك إيه ؟ وأخبار المشروع الجديد
يارب تكون في أفضل حال ..

الخير يا بينو في أمة محمد إلى قيام الساعة .. وامة النبي عليه الصلاة والسلام كالمطر الخير في أوله وآخره

عشان كده بنقول الحب في كل مكان حوالينا
;)

عصفور المدينة يقول...

مش عارف يا هندسة إنت بتدعو لدعم الرسايل اللفافةولا بتحاربها
أنا بصراحة ضد الحاجات اللي بتموت المبالاة
فباعتقد الرسايل اللفافة دي بتموت الأحاسيس
ولا أشجعها لأنها وصلت الناس إنها لا تقرأ
مجرد رأي وكنت ناوي أكتب عنه

BinO يقول...

Ammola
كويس حضرتك تنفعي تتبرعي لمعظم الفصائل


Ma3lina
والله يا ماعلينا
العملية صعبة عملياً و نفسياً
:)
والجو حر وأحنا داخلين في الجد
الحمد لله علي كل شئ

أستاذ عصفور
أنا فعلاً كنت بيحصلي ارتكاريا من الرسايل ديه وده كان شعوري فعلاً
أنها بتموت الأحساس
بس تعرف المشكلة أيه
أنها حقيقة موجودة
فحبيت أتعامل معها
حتي يتغير الواقع
والناس تبدأ تحس ببعض

BinO يقول...
أزال المؤلف هذا التعليق.
ياسمين يقول...

ربنا يوفقك ويوفقنا لعمل الخير
لكن بنك الدم والستشفيات فيها الكثير من جميع أنواع فصائل الدم
وأنا شخصيا احتجت يوما لنقل الدم ولم يرض اى طبيب ان يأخذ من أى حد من اخواتى اللى كلهم نفس الفصيلة لأن دة محتاج تحاليل جامدة قبل أن ينقل لى من دمهم وهو لا يعلم ما بهم من أمراض خفية وفضل أن اشترى من أحد بنوك الدم لأنها تكون خضعت لفحص وتحليل دقيق خاصة لفيروسات الكبد والإيدز
فهل قام أهل البنت بأخذ عينة من كل متبرع للتحليل قبل نقل الدم الى البنت؟
مع العلم أن تكاليف التحليل أكبر من تكلفة شراء الدم
تحياتى

Ma-3lina يقول...

كنت لسه هقولك انا فصيلة
A

ربنا يشفى كل مريض

بس صعب اوى حكاية تحرى كل ايميل او مسج يجى للموضوع دا

BinO يقول...

عندك حق استاذة ياسمين
بس والله ده اللي حصل واللي بيحصل
وعندنا مثلاً لو عايز دم من أي فصيلة غالياً حتلاقي ماعدا الفصائل النادرة , ولو موجود لازم تتبرع عشان تأخد دم
عموماً أعتقد في عمليات القلب تحاليل الدم لازم تتعمل

المهم انا مش كنت بركز علي نقطة الدم ذانه
ولكني كنت بركز علي نقطة الأحساس العام
وتكفلنا لنزيل ألامنا مثل الجسد الواحد
أيضاً نقطة تداول هذه المواضيع في الرسائل

BinO يقول...

ماعلينا
عندك حق فعلاً هو صعب
أمين

رفقه عمر يقول...

انا مريت بالتجربه دى كان اخى بيجرى عمليه قلب مفتوح ومحتاج اربع اكياس دم فريش وخمسه بلازما واحنا كنا مش عايزين من بنك الدم للتاكد من صلاحيه الدم وكنا محتاجين متبرعين وطبعا عملنا كل التحاليل الخاص بيهم ولا تتخيل الامر كان شاق قد ايه وخصوصا انه لازم يكون الدم خالى من اى امراض فيروسيه بجد بعد التجربه اللى مريت بيها دى لازم بجد كلنا نضع نفسنا محل صاحب المشكله لانه ممكن يمر بنفس الظروف
اللهم اشفى جميع مرضى المسلمين اللهم امين يارب العالمين
دايما كدة ياريت نذكر بعض باعمال الخير اللى هاتفيدنا اكتر ما هتفيد غيرنا لانها بترفعنا درجات عند الله سبحانه وتعالى

أمــانــى يقول...

الســـــــــلام عليكم
التبرع بالدم مهم جدا خصوصا هذه الايام ولازم نحث الناس عليه لان الامراض اللى محتاجة نقل دم كثيرة جدآ غير حوادث الطرق
والحمدلله انهم لقوا الدم بسرعة
ربـــــنا يشفيها ويشفى كل مرضى المســـــــــلمين يارب آمــــــــين
تحياتى لحضرتك

حائر في دنيا الله يقول...

الخير في وفي أمتي الي يوم القيامة
قالها الرسول، وهي موجودة ومجلولة ان شاء الله

mohandat يقول...

السلام عليكم
اخي بينو
مشكله الشعب المصري
مشكلتين
مروج جيد للاشاعات
وبيحب الهزار المستهتر قوي
ودا اللي بيخلي الرسائل تفقد مصداقيتها
تحياتي
علي تفكيرك فيهم

هذه المدونة لا تتبع أي جماعة ولا حزب ولا تنظيم ولا جمعية ولا تمثل أحدا الا صاحبها هي لكل مسلم محب لدينه وأمته وكل تعليق فيها يعبر عن وجهة نظر صاحبه فقط وهي على مذهب أهل السنة والجماعة ولن أقبل اي تعليق يثير الفتنة أو يخالف الشريعة
أسألكم الدعاء لي ولكل المسلمين
وأعتذر لكم عن التقطع في الكتابة في المدونة
معذرة