إِنَّ الدِّينَ عِندَ اللّهِ الإِسْلاَمُ

الثلاثاء، مايو ٢٩، ٢٠٠٧

رصاصة في قلب ميت

الثلاثاء

17/4/2007

الأسماعيلية

مسقط رأسي

كم أعشق هذه البلد البسيطة المتسعة الشوارع

الأسماعيلية فعلاً من أجمل مدن مصر , مدينة هادئة , قليلة في عدد سكانها

بها من المساحات الخضراء المتسعة ما يكفي لضعف عدد السكان أن يجدوا متنفساً ليشموا هواءاً نقياً

شوارع متسعة وسهولة في المرور

بلد مفيهاش مصانع ولا بزنس

فممكن نقول أن طبيعة أهلها مازالت بسيطة نقية الي حد ما

الحمد لله

الأخوان المسلمون يطلقون علي الأسماعليلة مهد الدعوة

ذلك لأن بداية نشاط الشيخ حسن البنا وزملائه كان من الأسماعيلية

حتي أن أحد زملاء الشيخ حسن توفاه الله منذ شهور وهو جد أحد اصحابي , وفي هذا اليوم أمتلائت المدينة بقادة الجماعة لحضور الدفن وأمتلائت أيضاً بعربات الأمن المركزي

علي فكرة صاحبي ده عايش في أمريكا ,عادي يعني ماورثش حاجة من جده :)

بتوع الحريات بيقولوا علي الأسماعيلية حبايب الحزب الوطني ,علي أٍاساس أن عضو مجلس الشعب العمال وفدي و الفئات أخوان ,عجبي

عموماً بعيداً عن القصص ديه أنا بحب الأسماعيلية , وكنت أتمني أن يشاء الله وأقضي بها عمري وأربي فيها أولادي , ولكن قدر الله وماشاء فعل

صديقي العزيز ..... زرته

ووجدت عليه علامات سعادة وضحك غريبة

مالك يا أبني

هو فيه حاجة لقيتها تبسط

زاد شوية في الأبتسام

وقالي اللي أنت متعرفوش أني كان عندي حملة أمبارح

صاحبي ده ملتحي زي حالاتي

وهو من الناس اللي ساعدوني في طريقي للألتزام اللي مش عارف أوصله (اللهم أرنا الحق حقاً وأرزقنا أتباعه )

طبعاً أنا مفهمتش وسألته

حملة أيه يا ابني أنت مش معاك رخص

ضحك

وقالي كانوا عندي في البيت امبارح

قلتله هما مين؟؟

قالي تتخيل مين يعني !!!!!

بدأت أهتم بكلامه

قلتله أحكيلي اللي حصل

قالي

الساعة 12:30 ليلاً كنت نايم كالعادة بدري عشان أقوم علي الفجر

لقيت الباب بيخبط

قمت وفتحت الباب

ليقت واحد منهم, وقلت أنت مين

قال أنت مش عارفني

قلتله طيب حلبس هدومي

ممكن ؟؟

قاله طيب

"مش هاحكي علي التفاصيل اللي حصلت خلال الدقائق التالية "

بس المهم في ضابط طلع

وأخذ في سؤاله عدة أسئلة

ودخل الشقة وقاله فين مكتبتك وقعد يقلب في الكتب

شغل علي ميه بيضاء

طبعاً المنظر كان علي السلالام وفي الشارع كأن فيه واحد غرقت العبارة بتاعته ب 1500 واحد وهو كان هاربان

أو واحد بيشرب عيالنا لبن فاسد ونايم في بيتهم كالملائكة

أو واحدة عجوز شمطاء بتسب في الأنبياء و تهفلط بكلام مالوش غير صفيحة الزبالة يتحط فيه

كل اللي عمله أنه ملتزم

J

طبعاً عشان متخضوش صاحبي رجع البيت في نفس اليوم بعد عدة تفاصيل مش عايز أذكرها علي أن يذهب عندهم في اليوم التالي

طبعاً وهو بيحكيلي

كالعادة دماغي جابت وراحت وجت في كل حتة

كنت غضبان غضب شديد

قاللي أنت متعرفش أنه خلاص أصبح قانون

قلت "اللهم أهلك الظالمين"

قال

{ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ }الروم41

ونعم بالله

هناك ٣٦ تعليقًا:

عصفور المدينة يقول...

يا عباد الله فاثتبوا

ma 3lina يقول...

بينو الموضوع دا اتكرر كتير جدا في الأسكندرية الأيام اللي فاتت دي ..

بيقولوا بيجددو معلومات المكتب

إن شاء الله خير ومفيش حاجة .. واسمع إن المعاملة طيبة .. غالبا يعني

غير إن أسوأ ما في الموضوع ترويع الآمنين اللي بيحصل أثناء الحملة ودي بشاير قانون الإرهاب

ربنا يثبتنا جميعا

BinO يقول...

أستاذ عصفور
مسامير

ماعلينا
أنا بتكلم عن أسماعليية يا باشا
والمعاملة مش هي لب الموضوع
عموماً
القصة معروفة مقصدتش الأعادة والله يعلم
بس حرقةالدم لما بطولك مش بتقدر تمسك نفسك

عصفور المدينة يقول...

ياد قول إن شاء الله

BinO يقول...

طبعاً أن شاء المولي يا أستاذ عصفور
لا توأخذني بما نسيت

Ma 3lina يقول...

طبعاً المنظر كان علي السلالام وفي الشارع كأن فيه واحد غرقت العبارة بتاعته ب 1500 واحد وهو كان هاربان

أو واحد بيشرب عيالنا لبن فاسد ونايم في بيتهم كالملائكة

أو واحدة عجوز شمطاء بتسب في الأنبياء و تهفلط بكلام مالوش غير صفيحة الزبالة يتحط فيه

كل اللي عمله أنه ملتزم

أمــانــى يقول...

الســـلام عليكم
لاتحزن ان الله معهم ان شاء الله
ربنا قدير وكبير وقادر على كـل شئ أننى احزن حزنآ شديدآ حينما أســـمع فى نشرة الاخبار القاء القبض على مش عارفه مين وناس تسحتق الاعدام عايشة بكامل حريتهم
هنقول ايه غير حسبنا الله ونعم الوكيــل
على فكره فى تاج لحضرتك

Dr.khaled يقول...

بصوا بقه يا جماعة ياللي
بتقولوا انكوا ملتزمين -وطبعا انا باقول كده عن نفسي-
لازم في يوم من الايام هنتاخد
يعني انا متاكد اني في وم من الايام هتاخد
النهردة
بكرة بعده بعد سنة اتنين عشرة
المهم اكيد يعني لازم يكون فيه حاجة زي كده
فعشان كده اننا مش شاغل بالي بموضوع انه حد يجي بيتنا ويتشرف ويتكرم
ثانياً...

بيتنا والحمد لله لا يمكن ابدا ان يطبق عليه قانون الارهاب ولا حتى قانون الطوارئ...ومفيش ظابط شرطة يتجرأ ويجي عندنا
عشان ربنا يخلي لنا الواد مؤمن واخوه عبد الرحمن والواد ابراهيم جارنا..مفيش زيهم في لق الطوب والجري السريع :)

بس المشكلة لو زارونا بالليل مش هينفع اروح اصحي لهم العيال
وربنا المستعان

ma 3lina يقول...

:(

mohand يقول...

السلام عليكم
المهم انه سعيد
صدقني الليل بعده نهار
وربك عارف موعد انتهاء الظلم والظالمين
والله المستعان
لن يعينك انسان

FTM يقول...

كلة لازم يزور البهوات الكبار فى بيتهم ..و بعدين لازم الضيوف يكرموا ولو فى الفجر يقولوا علية ما بيفهمش فى الواجب ولا اية !!

حسبى الله و نعم الوكيل

BinO يقول...

ماعليها
أنت بتأكدي الكلام

BinO يقول...

أستاذة أماني
علي فكرة الموضوع مش حزن
الموضوع موضوع غضب
الدفة ماشية في الناحية الغلط
رغم ثقتي أنها لن تلبث أن تنصلح
التاج علي عيني وراسي

د.خالد
كلامك أكيد
بس أبقي حضر الطوب

BinO يقول...

ماعلينا
أخويا
مالك
؟؟؟

BinO يقول...

مهند
ونعم بالله
والله متم نوره

BinO يقول...

FTM
لأ الواجب محفوظ
ولا يجوز التجاوز فيه
لا بالطول ولا بالعرض

محمد عبد الغفار يقول...

لعلهم

بس نفسى اعرف جبت منين ان الأسماعيليه مفيهاش بزنس وفلوس!! لا ادرى

BinO يقول...

أستاذ محمد عبد الغفار
جبت من أني عشت في الأسماعيلية سنين عمري
وفيها أهلي وأصحابي
وكلهم دلوقتي متغربين جوه مصر زي حالاتي , أو بره مصر
ليه
تفتكر ليه يا أستاذ محمد
هه
عشان أسماعيلية مفيهاش شغل
ده مش رأيي الشخصي
ده تصنيف الأسماعليلة
كمدينة
هي بلد الموظفين الأولي في مصر
منطقتها الصناعية التابعة للكويز تعج بالهنود والأتراك وغيره
والعمال الشراقوة
أما عن القري المحيطة فهي تعمل بالزراعة
ولو شئت تقول أن البزنس اللي في الأسماعيلية هو المانجو ومحلات الملابس والسنترالات
:)
ويجعله عامر

محمد عبد الغفار يقول...

انا على اتصال مباشر بالصناعات الأسماعلاويه ، الهنود تقريباً رحلوا والأتراك فى بدايه حضورهم والأستثمارات معظمها مصريه الأن ومن النوعيه التى تحتاج الى العماله الكثيفه الرخيصه والمدربة وجميع المصانع تشتكى من فقر ونقص العماله ، اما وان كنت تقارن بينها وبين القاهره فلا وجه للمقارنه

اما التوزيع الديموغرافى للعمال فلا اعرفه وقد يكون عندك حق ولكن هذه المصانع تستوعب الألاف

وتانى مره ملكش دعوه بالشرقاويه

BinO يقول...

بالنسبة لموضوع الهنود فده مش صحيح
بالنسبة للصناعات فمصانع الكويز كلها مصانع ملابس
يعني العملية عمال برضه
بالنسبة للشرقاوية فهم ناس بتوع شغل
:)
وبالنسبة للمقارنة
فهي لا تجوز

خرجتنا بره الموضوع الله يصلح حالنا وحالك
:)

Unknown يقول...

وما نقموا منهم إلا أن يؤمنوا بالله العزيز الحميد

يا قلبي يا غريب يقول...

السلام عليكم ورحمه الله و بركاته
كيفك يا اخي ..اسال الله العظيم رب العرش الكريم ان تكون بخير و علي طاعه
انت تقصد الاسماعيليه..شارع التلاتين و نمره سته و الحي الافرنجي و الجامعه القديمه....يا اخي...صبر جميل و الله المستعان علي ما تصفون

بالله عليك ادعيلي محتاج الدعاء

BinO يقول...

مناجاة
نحسبهم علي غفلة
هدانا الله واياهم

BinO يقول...

يا قلبي الغريب
أخيراً يا راجل
أنا بدخل عندك تقريباً يومياً
علي أمل ألاقيك رجعت
أتمني أن تكون بخير
ورينا يفك كربك
ويفرج همك
ويهدئ سريرتك


أيوة أخي الحبيب هي اسماعيلية
واضح أنك تعرفها كويس


أتمني ان تتذكرني بدعائك أنت الأخر

gohayna يقول...

معلش

نهايه الظلم قادمه لا محاله

ومهما طال الليل لابد من النور والحق ان يظهر علينا بالدعاء وعمل ما يستلزم فعله

وربنا معانا ويعننا

تحياتي ليك يا بينو

والف مليون شكر علي سؤالك عليا

بتمني اشوفك دايما

تحياتي

الطائر الحزين يقول...

طبعا انا مش هعلق على اللى حصل
بس ياريت لو الاسماعلية بالجمال دة ابقى شوفى لى يا عم شقة عندك وشغل و مرتب كويس ويكون فى حتة كويس وعمارة كويسة و ياريت يكون فيه جنينة وارض فضاء ويكون بعيد عن الناس شوية علشان لو حد عاوز يزورنا يلاقى حتة كويسة يقعد فيها
الا ان سلعة الله غالية

-_- يقول...

طب ليه يعنى

يفتشوا بيته او يسألوه عن حاجة ليه ؟

هو عشان ملتحى يبقى مثير للشكوك

khaled يقول...

السلام عليكم
ازيك يا بينو ايش اخبارك اشكرك جدا على سؤالك الكريم و انا الحمد لله كويس بس هى شوية انشغالات
ادعيلى بالله عليك
اما بخصوص الموضوع ده فاقول
حسبنا الله و نعم الوكيل

رينـــــــــــا يقول...

فكرتنى بفيلم الكرنك :D:D:D
ربنا يسترررررررررررررر عليناااااااااااااا

فلتثبت فلتثبت

نسرين - أمة الله يقول...

السلام عليكم
استاذ بينو
لاتحزن ان الله معنا
ادعى لنا بالهدايه

BinO يقول...

جهينة
أسأل الله أن تكون نهاية قريبة
وأتمني لك دوام الصحة والعافية
وحفظك الله في غربتك

BinO يقول...

الطائر الحزين
ربنا يرزقنا الجنة
ويرزقك الراحة الأبدية
في الجنة
أن شاء الله

BinO يقول...

شارم
مش عارف
تفتكر ليه ؟؟؟

BinO يقول...

وعليكم السلام ورحمة الله وبركاته أخي خالد
الحمد لله أنك بخير وربنا يهون عليك

BinO يقول...

رينا
ربنا يثبتنا أجمعين

BinO يقول...

نسرين
ربنا يهديني ويهدينا أجمعين

هذه المدونة لا تتبع أي جماعة ولا حزب ولا تنظيم ولا جمعية ولا تمثل أحدا الا صاحبها هي لكل مسلم محب لدينه وأمته وكل تعليق فيها يعبر عن وجهة نظر صاحبه فقط وهي على مذهب أهل السنة والجماعة ولن أقبل اي تعليق يثير الفتنة أو يخالف الشريعة
أسألكم الدعاء لي ولكل المسلمين
وأعتذر لكم عن التقطع في الكتابة في المدونة
معذرة