إِنَّ الدِّينَ عِندَ اللّهِ الإِسْلاَمُ

الثلاثاء، أبريل ٠٣، ٢٠٠٧

أحم ...........عني شوية

تاج
التاج هو أختراع الاخوة والاخوات المدونون
ومش عارف اذا كان اختراع مصري ولا المدونون الاوائل من قبل التاريخ واحنا بنطبقه يا عني
بس هو عموماً حاجة ظريفة عشان الناس تعرف بعض دون الدخول في تفاصيل شخصية .
يعني المدون عادة مش بيتكلم عن نفسه كتير من باب ان علاقته بالأخرين هي الكلام . فممكن تظهر النرجسية و العجب و النكسار و الخجل ووو وكله من خلال الكلام فقط لذا لزم الأدب و الهدوء
وأخوكم جاهل , انا جالي تاج من فترة من اختي في الله رفقة عمر ولكني طبعاً كنت جاهل ومعرفش يعني ايه تاج ولا حاجة فرديت رد غبي شوية ومجوبتش طبعاً علي التاج ,فبعتذر لها طبعاً علي جهلي الشديد .. ورفقة عمر جزاها الله خيراً هي اول حد علق عندي وبعديها أخي في الله ماعلينا وهما أكثر ناس شجعوني ومدونتهما اول المدونات اللي أنا بدخلها ,رغم أني مفتقد ماعلينا فعلاً ومش عارف هو فيه ايه بس رنا يفرج عنه وعنا اجمعين . زكان نفسي اعرف ماعلينا ورفقة عمر عرفوا مدونتي منين خاصة اني قعدت اكتب لنفسي 5 او 6 مواضيع قبل مايطلوا عليا , وماعلينا قالي وكنت مبسوط جداً بس رفقة عمر لسه ماقلتليش وارجو انها تقولي .
تاج أيه؟؟
التاج بعتته ليا الاخت ماعلينا ,وهي من أكثر الناس اللي عندها قوة ارادة وأنا اتمني أني امتلك نصف قوة ارادتها
التاج انا كنت ناوي أجاوب علي اسألته بعد ماأرجع من السفر بس لما دخلت علي مدونة رفقة عمر لقتها مجاوبة علي نفس التاج اللي جالها من ماعلينا الولد , قتشجعت وقلت أجاوب
وكانت الاجابات كالتالي
هل كنت طالب شاطر في المدرسة
هيهيهيهيه
موضوع الشطارة كان غريب جداً
انا كنت ساكن في حتة وبعدين اتنقلت لحت تانية فغيرت مدرستي والكلام ده كان في اولي اعدادي المهم اول يوم في الدراسة دخلنا الفصل وأخدنا درس وفهمت , واليوم التاني اكتشفت ان ده مش فصلي :)
اتنقلت فصل تاني والحمد لله مكنتش اعرف حد ولا حد يعرفني يعني كان الموضوع محصل بعضه مش حفتقد حد يعني
في الفصل الجديد لقيت مدرسة تانية بتشرح نفس الدرس اللي لسه كنت سامعه من 24 ساعة
هيهيهيهيهييه
طبعاً انا الوحيد اللي كنت بفهم واجاوب وارد والمدرسة كانت مبسوطة مني جداً جداً
وأنا طبعاً الريش نفش من كل حتة
و الموضوع عاجبني
ومن يومها بقيت كده بحب أبقي مفيش حاجة معرفهاش
فبقيت بحاول ابقي سابق الناس بخطوة ولا اتنين
بحفر يعني شويتين
رغم اني في الثانوي مكنتش بذاكر كتير بس ممكن تقولوا كنت عارف من اين تؤكل الكتف
أحب مادة وأكره مادة في المدرسة و الكلية ؟
في المدرسة
كنت بحب التاريخ جداً والجغرافيا رغم اني بكره مواد الحفظ عمي الا اني كنت بعتبرهم مواد فهم
يعني كنت بحب التاريخ لني كنت مقسم التاريخ في عقلي لمراحل زمنية والجفرافيا لأني كنت بحب اري الشياء بصورة مجملة من أعلي وده اللي بتعمله الجغرافيا
بحب الرياضيات جداً رغم اني كنت مش مستوعب النهاية التي تؤول الي الصفر الي الان :)
أكره المواد اي مادة فيها حفظ ومالهاش مفتاح عشان اعرف احبها
في الكلية
معرفتش احب حاجة خالص في الكلية غير الرسم الهندسي ممكن عشان انا خيالي واسع حبتين مقاس 43.5 بس الرسم الهندسي كان متعتي وامتيازي :) , باقي المواد كنت عابر سبيل بعدي امتحانات عشان انجح الا من بعض مواد الكمياء العضوية وغير العضوية و التحليلية
مكنتش بحب الكلية من الاخر
:)
كنت عايز تتطلع ايه و انت صغير ؟
وانا صغير مكنتش بفكر في موضوع حطلع ايه
رغم ان السؤال ده كان بيتسال كتيير
بس ممكن اكون في فترة عايز اطلع لاعيب كورة
أو صحفي عشان موضوع قراءة الجرائد اللي والدتي علمتهولي ده
كان نفسي اكون بين الاحداث مش بتفرج عليها بس
بس لما جت الثانوية العامية
ايوة العامية كان الأختيار صعب
لأني كنت جايب مجموع يدخلني الكلية اللي حكتبها أول حاجة في ورقة التنسيق 98.5
كنت محتار جداً
ومكنتش عايز أخنق نفسي
كنت عايز انطلق
كان جايلي هفوة أخش تجارة
ايتدي حياتي بدري بدري
وشوية ميول في الكومبيوتر وكام كورس وابقي حر
وصحيت من احلامي وشاء الله
امام طلب والديا
ودخلت كلية الهندسة
منكرش ان الهندسة ليها فضل كبير عليا جداً
والحمد لله علي كل شئ
التاج بهديه لأخي في الله ورفيق رحلة الكفاح في الكلية والعمل أهل الجنة
والي كل من
و المدونة العظيمة ميمو رغم اني عارف انها مش فاضيالي
واخي و حبيبي صاحب مدونة يا قلبي يا غريب

هناك ٣٢ تعليقًا:

Memo يقول...
أزال المؤلف هذا التعليق.
Memo يقول...

يا دحاح يا محمد
يا حظك النار
يا محظوظ يا مبخت
http://mafrosa.blogspot.com
اللهم لا حسسسسسسسسسسسد

غير معرف يقول...

:)...ما شاء الله و كويس انك مبسوط من هندسه و من شغلك و ان ربنا كرمك..عقبلنا

رفقة عمر يقول...

98.5 % هو انت من الناس اللى بتجيب الدرجات دى اللهم لا حسد ربنا يستر بعد البوست دة

رفقة عمر يقول...

ايوة نسيت اجوبك على سؤالك والله مش فاكرة للى فاكره انى لاقيت مدونتك جميله قوى وكلامك اجمل وخصوصا انها بتتكلم فى الدين فكنت فعلا باستمتع بدخولى مدونتك وكنت بازعل لما كنت مش بتكتب كتير ولما طلبت منك تعمل التاج السابق كنت نفسى الناس تستفيد من مدونتك ذى ما انا استفدت منها
عقبال ماعلينا كدة اما نشوفه بخير انا عماله اعمله نداءات وهو برضه مش راضى يستجيب ومن مدونتك بقوله اوعى تكون زعلان منى وانت اكيد تعرف ااقصد ايه ياماعلينا انا كنت فى حاله صعبه واسفه انى كنت حادة
عود ياماعلينا

gohayna يقول...

ماشاء الله
اهه دا الاجتهاد ولا بلاش
اللهم لاحسد
انا بنق بس

ربنا معاك

حائر في دنيا الله يقول...

كنت هنا بالامس ولولا النت لكنت سجلت زيارتي في الموضوع السابق وتكرت تعليقي عليه
ولكن وضعني القدر هنا الآن لأسجل اعجابي وتقديري لك
وتمنياتي لك بأن تكون مهندس رائع ترفع رأس مصر ورأس الإسلام
لنكون أمة على قواعد من حق
قوية
مع تحياتي

يا قلبي يا غريب يقول...

السلام عليكم ورحمه الله و بركاته
اخي و حبيبي بينو
ماشاء الله عليك
اسال الله ان يجعلك من الفالحين الناحجين و ان يرفع الله من شئنك و ان يعلي الله من قدرك..يا اخي و الله بسعد بمجرد ان اري اسمك

و الله اخي بحبك في الله



فصبر جميل و الله المستعان علي ما تصفون

أمــانــى يقول...

بسم الله مشاء الله
يــــارب تكون موفق دائمآ

BinO يقول...

هو يا جماعة مقياس التفوق هو الثانوية العامة
:)
القصة مش كده بس ماعلينا
انا مش زي ماالناس فاكرة و الله اعلم بما في نفسي
وشكراً علي دعائكم جميعاً

BinO يقول...

ميمو
كلنا في الهوا سوا
انت مهندسة برضه
بطلي حسد
وقر
عيب

ارتعاشات
مقالتك قبل الأخيرة لسه مش فاهمها
وراعشاني
ورينا يكرمك اخي في الله

BinO يقول...

رفقة عمر
الثانوية العامة المصرية ليست مقياس التفوق
اعتقد ن صبر الناس ومصابرتهم علي كل هذا العناء هو مقياس التفوق
عموماً انا بضم صوتي لصوتك وبقول عود يا ماعلينا
وحشتني

BinO يقول...

جهينة نفس الكلام
شكراً علي تشريفك


حائر في دنيا الله
اتمني ان اري تعليقك علي الموضوع السابق لأنه في واقع المر يهمني أكتر
وجزاك الله خيراً علي مجاملتك


يا قلبي يا غريب
منتظر اجابتك علي التاج علي احر من الجمر
معزتك عندي كبيرة جداً

استاذة اماني جزاك الله خيراً
ووفق الله خطاك

محمد عبد الغفار يقول...

اهلاً بك فى عالم التاجات ، أستلم بقى

الصدق يقطر من اجابات التاج

BinO يقول...

أستاذ محمد
أهلاً بحضرتك نورت وأنست
جزاكم الله خيراً

Fo2sh يقول...

كلا حلو و الله
:):):)

ما أهمية بضعة أعوام سيئة في تاريخ يتكلم بألاف السنين

مـحـمـد مـفـيـد يقول...

تاج صريح يستحق الثناء

BinO يقول...

فؤش
شكراً يا جميل
ومعلش علي زيارتي القصيرة و لكن ان كاتب 4 موضوعات متصلة


أستاذ محمد
أشكرك علي أطراءك

david santos يقول...

Hello, Bino!
This work is very good, thank you
have a good day

mohand يقول...

السلام عليكم
اخي في الله
تعليقي هذا لا يخص الموضوع المكتوب
ولكن وصلني منك تعليق بانك فهمت موضوعي عكسيا
هل من الممكن ان تكتب لي وتوضح ما مدي فهمك ونقدك للموضوع
ولكم جزيل الشكر
اخيك مهند المصري

Dr.khaled يقول...

سلام عليكم

ايه الحلاوة دي ..ما شاء الله
على فكرة يا استاذنا
انا كنت هعلق في موضوعك لما كنت في كوريا الشمالية

لكن التعليقات كانت كتيرة والصفحة هنجت..وانا اساسا مهنج وعايز اعمل ريستارت

المهم
واضح انك كنت شاطر يا بشمهندس..عيون...
حقيقة انا مبحبش اتكلم عن شخصية سيادتي..
لأني كما هو موجود في البروفايل بتاعي شخص مهم جدا

معلشي يا استاذنا..هضطر أؤجل موضوع التاج ده كام يوم لغاية ما يحدث تفاعل في الموضوع الجديد اللي كتبته عن التقريب بين الاخوان المسلمين والسلفيين بدلا من اللتقريب بين الشيعة والسنة

والله المستعان

islam yusuf يقول...

دى أول زياره ليا
و عجبنى الموقع جدا
ودى مش هاتكون الزياره الأخيره
أتمنى التواصل

BinO يقول...

David santos ur welcome
don`t about wt but it`s ok


خالد
ولا يهمك
هيا الجنوبية علي فكرة
علي فكرة انا حاطط لينك لموضوع الأخوان في الصفحة عندي لأنه عاجبني جداً
كنت حاسس اني انا اللي بتكلم
عموماً انا مكنتش شاطر ولا حاجة
دي الفهلوة الفرعونية المجيدة
خد رحتك بس ماتنسانيش

FTM يقول...

اسلوب التعليم فى مدارسنا و كلياتنا يخلينا نكرة اللى نحبو و نحب اللى ممكن فعلا يكون بعيد عن ميولنا مافيش ابداع فى طريقة عرض المناهج

المهم , ربنا يوفقك دايما و تحياتى ;)

عصفور المدينة يقول...

عايزين أسئلة دسمة عن كدة
نريد أن نعرف المزيد
أخونا خالد اللي هو نيوخالد شبط في الموضوع وزود على ما أرى طبعا انا نفسي اجاوب عليه بس المشكلة إن ما حدش عزمني

Ma 3lina يقول...

ما شاء الله 98
كنت شطور جدا باه

تصدق ان تجارة دلوقتى ما شاء الله فعلا مع حبة كمبيوتر و لغات بقى كارير تحفة و ليه سوقه

يالا الحمد لله بس مقلتش كنت هندسة قسم ايه ؟؟؟

-_- يقول...

هندسة قسم ايه ؟؟ ولا لسة ؟

khaled يقول...

هى التيجان وصلت عندكوا؟

BinO يقول...

ftm
عندك حق
وربنا يوفقك انت كمان

عصفور المدينة
الأخ خالد فعلاً كلامه جميل
وعايزين نعرف عنك أنت كمان أستاذ عصفور


ماعلينا
هندسة تكرير بترول
وأنا مكنتش شاطر ولا حاجة
هي بس الفهلوة الفرعونية المجيدة

شارم
هندسة تكرير بترول


أستاذ خالد
أيوة
بس متجيش حاجة جنب تاجك الجامد جداً

Karim Ali يقول...

ممكن تكون دى الزيارة الأولى لمدونتك .. بس أوعدك إن شاء الله مش الأخيرة.. أنا قريت كام مقالة من مقالاتك .. وأعجبت بيها جدا الحقيقة... بس فيه نقطة صغيرة..بقى تكون هندسة بترول .. ومنشوفش مقالة كدة ولا كدة تعرفنا بالمجال ده؟؟؟!!!!
لا لا أحنا كدة حقنا نزعل منك
:)
ياريت ماتحرمناش من متعة التعرف على مجالك ولو حتى من بعيد
تقبل تحياتى

Dr.khaled يقول...

استاذ بينو

اريد مراسلتك في امر
اذا تسمح تعطيني ايميلك
او تراسلني على ايميلي في البروفايل الخاص بي في البلوجر
اذا كنت لا ترغب في وضعه هنا
وتقبل تحياتي

عين ضيقة يقول...

مدونتك باس عيون ودا أكتر شىء لفت نظرى

عموما انت شرفتنى فى مدونتى
وانا سعيدة بدخولى عندك

سلام

هذه المدونة لا تتبع أي جماعة ولا حزب ولا تنظيم ولا جمعية ولا تمثل أحدا الا صاحبها هي لكل مسلم محب لدينه وأمته وكل تعليق فيها يعبر عن وجهة نظر صاحبه فقط وهي على مذهب أهل السنة والجماعة ولن أقبل اي تعليق يثير الفتنة أو يخالف الشريعة
أسألكم الدعاء لي ولكل المسلمين
وأعتذر لكم عن التقطع في الكتابة في المدونة
معذرة