إِنَّ الدِّينَ عِندَ اللّهِ الإِسْلاَمُ

الثلاثاء، يونيو ٢٦، ٢٠٠٧

ولاد الناس ......ولاد أيه؟

بناء علي طلب أختي في الله رفقة عمر موضوع قديم أيام

كلمتين لطالما كان لهما مدلول عميق في طبقات الشعب المصري خلال ال50 عام الماضية

كان الواحد لما يتقال عليه ابن ناس

يعني انه واحد متربي

و أهله متربين

و جدوده متربيين

يعني العائلة و أصولها عندها أخلاق و قيم

و كانت البنت المحترمة يتقال عليها أصلها من بيت

وعليتها محافظة

الله

كلمة جميلة

عيلة محافظة

J

الموضوع و لا كان مرتبط بمال و لا أطيان و لا غيره

كان كله حول الاخلاق و السلوكيات

علي الاقل كان هو ده المفهوم داخل الطبقة المتوسطة

التي كانت العمود الفقري للمجتمع

و اكبر فئاته

الموضوع أنهارده أتغير تماماً

وولاد الناس مبقوش ولاد الناس

وولاد ال(...) هما أصحاب الاصول

حسبات تانية

الواحد بيتحكم عليه من لبسه

يعني لو لابس فانكي و علي الموضة

هو ده

ده شكله بن ناس قوي

ونوع الموبيل بيفرق

لو أنت بتغيره كل شهرين

يبقي انت بن ناس قوي

يا سلام لو أنت بتقضي الصيف في مارينا

يبقي انت من صفوة ولاد الناس

يعني أنت مأصل

يا سلام لو كنت بتعرف فرنساوي و لا أسباني

طبعاً جنب حبة حاجات من اللي فاتت

يبقي أنت عاديت

هنيالك يا عم

خش أي كلية وخد دبلومة هيومان ريسورس

ولو أنت ابن ناس بجد

يبقي أشتغلت في أحسن شركة

زبط عربية تمام

لازم تكون ألماني

وأوعي تقول شرق أسيا

ألماني يعني ألماني

دوس يا عم

لأن موضوع العربية بيفرق كتير

في حكاية ابن الناس

العربية دليل سريع جداً

عامل زي مايكون شاشة بتحدد درجة قربك من قمة ولاد الناس

مش مهم انت ايه

المهم انت نازل من عربية شكلها ايه

وخد بالك من كلمة نازل

لأنك لو ماشي محدش حيخد باله منك

ولاد الناس لازم يكونوا بيشربوا سجائر

وطبعاً مش أي سجائر

يعني في حاجات بتاعت ولاد الناس و حاجات بتاعت مش ولاد الناس

وياسلام لو مخدرات

ولاد الناس بيلعبوا رياضة

طب ما كل الناس بيلعبوا رياضة

لأ ولاد الناس بيلعبوا تنس أو جولف

او بانجي جانب

ممكن غطس وساعات أسكواش

يعني لو أنت ماشي في الشارع معاك المضرب

يبقي أنت أكيد ابن ناس

ابن الناس لازم يكون يعرف بنات كتييير

كتييير جداً

و لازم يكونوا ولاد ناس برضه

بنت الناس حكياتها حكاية

عربيتها لازم تكون جيب

أمريكاني

واللبس مش حينفع يتوصف

بنت الناس من الاخر

مقدرش أعلق عليها

انا سمعت واحد من ولاد الناس بيقول أنه بينزل يظبط شغله ساعة صلاة الجمعة

عشان الشوارع فاضية

طب ما هو لو كل ولاد الناس عاملوا كده الشوارع حتتزحم

ساعة صلاة الجمعة

و لا عزاء لولاد الناس

هناك ١٦ تعليقًا:

.:.-=- ELGaZaLy-=-.:. يقول...

نا سمعت واحد من ولاد الناس بيقول أنه بينزل يظبط شغله ساعة صلاة الجمعة

عشان الشوارع فاضية

طب ما هو لو كل ولاد الناس عاملوا كده الشوارع حتتزحم

ساعة صلاة الجمعة

و لا عزاء لولاد الناس

----------------------------------

تعرف بالرغم من النبرة الحزينة والساخرة فى المقال الا انى حسيت بيك اوى...

بس دول ولاد ستين ناس مش ناس واحدة بس

ملحوظة يمكنك مكان كلمة ناس وضع منا شئت

بص فى زمن الموازين المقلوبة يكون الطبيعى ان نمسك بالكتاب بالعكس

والاوضاع تتعكس والناس تتغير وتبقى سبور

والا تبقى كخة ووحش...اه يا ولاد ال

ناس

عصفور المدينة يقول...

طيب واللي قرأ البوست ده قبل كدة؟؟؟
جزاك الله خيرا عشان كدة أنا اخترت عصفور المدينة

يعقــــوب .... يقول...

جميل.بس حاسس انك بتعمم. ما هو في ولاد ناس بجد و بيعملوا معظم الحاجات ده.قصدي العادي و الكويس منها.زي العربية الالماني و لعب الاسكواش

BinO يقول...

.:.-=- ELGaZaLy-=-.:.
جزاك الله خيراً علي الزيارة

ولعلهم في غفلة
المشكلة مش فيهم
المشكلة فيمن يضع المعايير


أستاذ عصفور
:)
معلش استحملني بقي

BinO يقول...

يعقوب
كما قلت سلفاً
المشكلة في نظرتنا نحن
يعني تقييمنا السطحي بغض النظر عن واقع الأمر
:)
أنا كنت بلعب أسكواش
:)

أمــانــى يقول...

ده ولاد الناس النوع من الجديد
ولاد ناس العولمة والانفتاح
ولاد ناس هاى كلاس
ولاد ناس تمشى بسرعة الطائرة وهى وماشية تاخد معاها كام روح بنى ادم من الغلابة اللى مش هيعرفوا يجبوا ولاد الناس
ولا عزاء لمصرنا مع
ولاد الناس
ربنا يرحمنا من ولاد الناس بتاع اليومين دول ويرجع ولاد الناس بتاع زمان
ربنا يرحمنا من عنده
تحــباتى لحضرتك

رفقه عمر يقول...

شكرا ليك كتير على طلبيه طلبى لان بجد البوست دة كان عجبنى جدا ولخصت فيه كل الظواهر اللى بيعملها شباب كتير
وبقت التفاهه هى صفاتهم الاساسيه
كان البوست دة اول حاجه قراتها عندك هو موضوع اللحيه كان رائع جدا برضه
ومن وقتها وانا لازم ازور مدونتك واتابع كل جديد فيها
ربنا يجعل هذه المدونه فى ميزان حساناتك وتكون من ضمن الثلاثه اللى رسول قال عنهم اذا مات ابن ادم انقطع عمله الا من ثلاث طبعا رزقك الله بالولد الصالح اللى يدعو لك
وعلما ينتفع به وارجو ان تكون هذه المدونه هى هذا العلم
وطبعا صدقه جاريه

عمرو المصري يقول...

الي اولئك الذين المهم صور اقتتال الاخوة الاشقاء في فلسطين


الي كل من تخيل ان الاخوة الاشقاء باعوا القضية لاعدائهم واجهزوا علي ماتبقي منها


الي كل من انجر وراء حملة التضليل الاعلامي التي ساقوها علينا

الي كل ساع الي الحقيقة

الي كل هؤلاء اهدي

التبيان في اقتتال الاخوان

تجدونه فقط

في

ارض الحرب

حائر في دنيا الله يقول...

دبلومة ايه
وعربية ايه
وموبايل ايه

طب مينفعش هليكوبتر ايه!!!!

mo'men mohamed يقول...

جزاك الله كل خير أخى
والله حال ما يضحك و لكن يبكى
السلام عليكم

خمسة فضفضة يقول...

السلام عليكم ورحمة الله وبركاته

صحيح :
شر البلية ما يضحك

الدمعه يقول...

والله انت عندك حق
رغم اسلوبك الساخر بس في المضمون
نظريه الناس اختلفت كثير وتفكرهم كمان اختلف
من الاخلاق والادب الحسن
الى كثرة المال والمظاهرة الكاذبه

ربنا يعفينا يا رب
بس انت بجد كلمك جميل بارك الله فيك

علاء يقول...

أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

المجاهدة يقول...

:d
احييك
كتابة البوست بطريقة معبرة اوى
:d



للاسف المجتمع سطحي جداا جدا

ابن ناس مفترض يعني شخص متربي
شخص خلوق
شخص بيساعد
و بيقدم للناس

و ساعات كلمة ناس نضيفة... بردو على نفس الحاجات
تعاملاته محترمة بجد تأسر الي حواليه انهم يقولوا الحمد لله ان لسه فيه ناس بتربي ولادها كده



اما بقى لو الفانكي بقى ولاد ناس!!!
:s

كل مرة اشوفهم لازم اقل نفس الجملة.... هما اهاليهم بيرضوا يخرجوهم ازاي كدهع بره بيوتهم!!

ربنا يهديهم و يعافينا

جزاك الله خيراً :)

shlapia يقول...

بوست هايل بجد

بالذات الجزئية بتاعت العربية انها مراية لمستوى الشخص

دى فعلا حقيقة

ما شاء الله عليك بوست من الاخر

سلام

رفقه عمر يقول...
أزال أحد مشرفي المدونة هذا التعليق.
هذه المدونة لا تتبع أي جماعة ولا حزب ولا تنظيم ولا جمعية ولا تمثل أحدا الا صاحبها هي لكل مسلم محب لدينه وأمته وكل تعليق فيها يعبر عن وجهة نظر صاحبه فقط وهي على مذهب أهل السنة والجماعة ولن أقبل اي تعليق يثير الفتنة أو يخالف الشريعة
أسألكم الدعاء لي ولكل المسلمين
وأعتذر لكم عن التقطع في الكتابة في المدونة
معذرة