اللي أختشوا ماتوا

بسم الله و الصلاة والسلام علي رسول الله
مديري الجميل جابورة
راجل متختخ
بس عقله مفتح كنا أصحاب
كنا قاعدين قاعدة صفا
قاعدة ظريفة
يعني كنا بناكل من الأخر
وهات يا كلام
قالي تعرف اللي أختشوا ماتوا ليه ؟؟؟
طبعاً كنت حفتح بقي بس لحقت نفسي
و ضحكت الضحكة البلهاء أياها
وقلتلوا مش عارف ماتوا أمتي و فين
قالي أصلك لسه صغير
كان عنده حق ال25 سنة علي الأقل اللي بينا تخليه يتكلم زي ما هو عايز
قولتلوا ماتوا ليه
قالي كان فيه حمام من بتوع زمان
من زمان برضه
كان حمام نسوة
بيروحوا ينضفوا وبخار وساونا و غيره
كانت الحمامات ديه منتشرة في احياء مصر الحروسة
المهم الحمام ده حصلت فيه حريقة
الناس اللي لابسة طلعت تجري بره
و الناس اللي مش لابسة حبة طلعوا بره
و اللي أختشوا ماتوا
قلتله واضح أن كل اللي بيختشوا كانوا في الحمام
ضحك و طبعاً كرشه العظيم أهتز أهتزازات واضحة
وقالي لأ لسه في ناس بتختشي
طبعاً المثل أنتشر بعد كده
وأصبح ينطبق علي كل موقف يحدث والجليطة أو الوش المكشوف و البجاحة تظهر
أسف علي المصطلحات المستخدمة
أصل قلة الحياء أصبحت موضة هذا الأيام
أين الحياء
دلوقتي البنت متبقاش بنت ألا لو كانت بتستخدم مترادفات غليظة
وممكن نقول قبيحة
تتكلم زي الرجالة
تسترجل
وتنزل
وتنزل وتنزل
وأن أنكشف البرقع
كان الأول برقع حياء
يعني البنت تتكلم مع رجالة
تصاحبهم
بوي فريندز زي الرز
وبعدين حاجات تانية بدأت تنكشف بعد البرقع

طبعاً الرجالة عندهم لغة خاصة جداً في كلامهم بينهم و بين بعضهم
لغة مميزة
زي الشفرة
أول ما بنت تدخل في المكان
الناس تتحول و ترجع كوكب الأرض
ويتكلموا زي البني أدميين
ونفس الشئ كان بالنسبة للبنات
بس ده كان زمان
مابقاش فيه حاجة أسمها كلام رجالة و كلام ستات
يعني الشلة اللي قاعدة في كافية و لا في الشغل
عادي جداً أنه يتفتح أي موضوووع
أي موضوع وعن أي شئ
كلمة "في بنات قاعدين " أنتهت
و نزلت الانثي عن عرشها
و لهثت وراء عالم القباحة
الكلام ده لمسته جداً بس بصورة محدودة في فترة الكلية و ما بعدها
ودلوقتي أتفرج علي المدونات و اللي بيحصل فيها
لولا التاء المربوطة التي ربما ترتبط ببعض كلمات البنات
لا تستطيع تمييز بنت من ولد
طبعاً مش كل البنات بس
أصبحت صفة غالبة
بنات و مش بنات
صفات تشريحية أنثوية وغير كده مفيش
لا رقة و لانعومة و لا عواطف
أسترجال و أستهبال
وسمحوني علي المصطلحات تاني

لقد قال رسول الله صلي الله عليه و سلم أن الحياء شعبة من شعب الأيمان

وقال المولي عز و جل:
{يَا أَيُّهَا الَّذِينَ آمَنُوا لَا تَدْخُلُوا بُيُوتَ النَّبِيِّ إِلَّا أَن يُؤْذَنَ لَكُمْ إِلَى طَعَامٍ غَيْرَ نَاظِرِينَ إِنَاهُ وَلَكِنْ إِذَا دُعِيتُمْ فَادْخُلُوا فَإِذَا طَعِمْتُمْ فَانتَشِرُوا وَلَا مُسْتَأْنِسِينَ لِحَدِيثٍ إِنَّ ذَلِكُمْ كَانَ يُؤْذِي النَّبِيَّ فَيَسْتَحْيِي مِنكُمْ وَاللَّهُ لَا يَسْتَحْيِي مِنَ الْحَقِّ وَإِذَا سَأَلْتُمُوهُنَّ مَتَاعاً فَاسْأَلُوهُنَّ مِن وَرَاء حِجَابٍ ذَلِكُمْ أَطْهَرُ لِقُلُوبِكُمْ وَقُلُوبِهِنَّ وَمَا كَانَ لَكُمْ أَن تُؤْذُوا رَسُولَ اللَّهِ وَلَا أَن تَنكِحُوا أَزْوَاجَهُ مِن بَعْدِهِ أَبَداً إِنَّ ذَلِكُمْ كَانَ عِندَ اللَّهِ عَظِيماً }الأحزاب53

أداب جمة قرأناً و سنة

لكن أحنا ماشيين و مغمضين
فاكرين أن كشف المستور فقط لأنه مستور هو التحضر
و الست كل ما تكشف اكتر
يبقي أحنا وصلنا
و البنت زي الولد
طب أزاي
صحيح اللي أختشوا ماتوا