إِنَّ الدِّينَ عِندَ اللّهِ الإِسْلاَمُ

الخميس، نوفمبر ٠٢، ٢٠٠٦

عايز حاجة مش عارف ايه

بسم الله الرحمن الرحيم
وبه نستعين
و الصلاة و السلام علي رسولنا محمد صلي الله عليه و سلم
و علي اله و صحبه أجمعين


مش عارف ليه الأمور مقلوبة في بلدنا و الصح أصبح خطأً و الخطأ أصبح صح
انا ابتديت بالموضوع ده لأن مفيش حد فينا بيبدأ يومه الا و يتحرق دمه بسبب الموضوع ده حقولكم ازاي
لو اعتبرنا ان كل واحد فينا كل حاجة ماشية عنده صح لحد باب بيته , اول ما بيخرج من باب الشقة يروح علي باب الأسانسير و يضغط علي الزر و يقف يستني و تبتدي الحدوتة , يجي واحد (اعتقد انه جارك لأن الدور ممكن يكون فيه 5 شقق و الناس مش فاضية تعرف بعض و لا تزور بعض المهم حنفترض انه جارك اللي ساكن جديد) ,رغم ان انت دوست علي زرار الأسانسير تلاقي جارك راح و داس علي الزرار برضه و جايب معاه مراته و اولاده و شايل شنططين و يبصلك نظرة سريعة و نص ابتسامة و يقول لك صباح الخير ويقف امامك هو و رفاقه يعني من الأخر حيركبوا و استني انت النقلة الجاية (مش حتضايق و لا حاجة عندك وقت و ممكن يكون هو مستعجل ولا حاجة ) المهم انت حتاخد النقلة اللي بعدها ده لو هو ما نساش يقفل باب الأسانسير و قعدت انت تزعق من فوق علي عم سيد البواب اللي حيكون نايم طبعاً .
المهم انت نجحت تنزل بطريقة ما ووصلت لعربيتك (لو كنت غني و ركنها في الجراج حتلاقيها مغسولة و البواب مظبطهالك علي الأخر ) بس انت غلبان و ركنها في الشارع جنب و حتلاقي السايس راكن امامها و خلفها و جنبها عربيات تانية طبعاً حتتوهم و تدور علي السايس اللي حيقولك يا بيه معلش أكل العيش و احنا بنسترزق ,طبعاً انت مش حتخش في مناقشات عقيمة ان الشارع ملك الدولة و مش ملك أهل الساسي ووووو, الحق انت عندك شغل (لو انت محظوظ السايس ممكن يكون عنده ضمير و ما نايملكش فرده و لا اتنين عشان تحرم تركن هنا تاني ) بس انت محظوظ و العربية تمام :) و ركبتها أخيراً و السايس جاب فوطة ووقف جنب العربية وخططلك الزجاج بالفوطة ووقف جنبك مبتسم عشان تديله اللي فيه النصيب ,تقدر تقول لأ.
أشارة المرور : هي أختراع مش عارف مين اللي اخترعه بس كان الهدف منه تنظيم حركة المرور في التقاطعات المتتابعة دون الحاجة لوجود عسكري المرور , وده اللي احنا طورناه لو الأشارة حمراء و انت حاولت تقف , اوعي تفكر تعملها حتلاقي سيل من السباب و اللعان وراك و جنبك و نظرات تعجب من المشاة منك , انت ازاي تقف و الأشارة حمراء واضح انك مش هنا
...........................

2 b CONTINUED


ليست هناك تعليقات:

هذه المدونة لا تتبع أي جماعة ولا حزب ولا تنظيم ولا جمعية ولا تمثل أحدا الا صاحبها هي لكل مسلم محب لدينه وأمته وكل تعليق فيها يعبر عن وجهة نظر صاحبه فقط وهي على مذهب أهل السنة والجماعة ولن أقبل اي تعليق يثير الفتنة أو يخالف الشريعة
أسألكم الدعاء لي ولكل المسلمين
وأعتذر لكم عن التقطع في الكتابة في المدونة
معذرة